Revelation of John 18
Babilon ikalouw
1Wankuyeim mo akin Yowbad nataka̱yob teitan meinoy neim walba̱lab, nakaleiwag tawtoun, ankakin kamnat, waseg imteil ven babaw.2Iwak, aygan avakaein, ilana,
“Babilon bo ikalouw; ven towen avakaein bo ikalouw.
Bo imlavag a̱luw siven.
Bo imlavag baloum siven.
Bo imlavag man siven, mansiyas bwaboum, o mansiyas askakin kalbaleb.
3“Peinan iwmwamwes ven babaw gimgilis yvgamun geinawl waseg;
o guyawaw watinow nisisubwans sisiy;
o takalwelews ven watinow singay ikunakuns waseg mana̱wen, mapuna itawtouns singay.”
4Aygan teitan walba̱lab aligen, ilana, “Agugwamag yakamiy, kadiloka kulisawes Babilon; awoum kula̱tans simiyas takalbalebs tasiyas; mata kukwawes asisinap kalbaleb, simouvit biwekeimiy yakamiy.
5“Asisinap kalbaleb kalgutan talog ee... mo bein-o walba̱lab, peinan singay babaw, o Yowbad ininuway asisinap singay avakaein, kalbaleb.
6“Ven towen gimgilis bo iyagages gamags, kadiloka kuyagages tasiyas ma̱wan. Aveiyag bo inuwakes, kadiloka kuvag sivay waseg ven towen. O peinan kwa̱vig yayan nisekes gamag beimoums, kadiloka kuvgog ven towen askwa̱vig sivay beimoums.
7“Kusek mamayuy son va̱lam, bikatimop kaya̱pam son gidukis. Peinan wananon ininuway mamagina, ilana, ‘King nakwav yey asesun-wan bwein. Nag basikam sewed; nag bava̱lam; nag.’
8“Mapuna yam katanok mo bilouvat inamouvit avakaein, kanig, va̱lam, moun, o kov bigob waseg. Peinan tawtoun guyaw Yowbad nakaleiwag towen.”
9O guyawaw tasiyas nikaninavays sisiy, o nimsamwas sisiy, igaw bikines musewun kov towen igob waseg, mo biva̱lams.
10E, aspwa̱yat peinan mamayuy nilouvat waseg, itowas kadiveiyov, ilansa, “Eew, eew, ven towen avakaein; ven towen Babilon tawtoun, singay nuwanaw mo ilouvat ankalbaleb.”
11Tasiyas takalwelews iva̱lams silma̱nin ven towen, peinan sikabeikun bo ikous.
12Bo ikous sikabeikun waseg goul, silib, dakul ankakin bwanabwein, lap, kweim mwaynsiyas bwabwel, kudikwad, pwapwa̱kaw, o kweim kala̱lav, kay kasiyas manisin bwanabwein, youd kavsiyas elepant anadog, o kaligweg bwanabwein, o tanmunum bwabwel, o tanmunum tonen, o dakul pwapwa̱kaw, atanoun, sisayal, gewuw, mul, pilankinsens, gleip sipinen, tagon, pwalaw, wit, bulumakaw, sip, hos, wag, gamag va̱gan biwteles siwotet.
14Gamag bidibakes ven towen, bilansa, “Anagin to sivinam, bo ilisaweim. Muvavag son yakawanam bo ikous; nag vayuwein bukuban, nag.”
15Takalwelews tasiyas, kweiboug sikabeikun avakaein waseg ven towen, aspwa̱yat peinan ven towen mamyuyan nilivet, itowas kadiveiyov, ivva̱lams, ilansa, “Eew, eew, ven towen avakaein, tawtoun, nisikam anakweim pwapwa̱kaw, bwabwel, kudikwad, niguwa̱vin goul waseg, o dakul bwanabwein magin waseg, o lap waseg.
17“Singay nuwanaw ven towen bo iyagages wuliyougwan meivek-wan.”
O taginiwags babaw o wunataws babaw itowas kadiveiyov-o, aspwa̱yat peinan ikines musewun ven towen nigidaged kovanen. Tasiyas ages avakaein ilivans, ilansa, “Ta-kweitan ven ankakin ma̱wan towen.”
19E, mo ikumus kunus, iva̱lams avakaein, ilansa, “Eew, eew, ven towen avakaein; babaw ya̱kids dawags sam, nitayuwouts mo nitaba̱nes youd babaw ven towen waseg; nagein gog singay nuwanaw niyagages.”
20Mapuna kumwa̱saws min-liba̱lab yakamiy; simiyas Yowbad angamag ven watinow o takaweins liva̱nen Yeisuw, o palopit tasiyas; peinan ven towen niyagageimiy, mapuna Yowbad bo imop mikalbaleb; iyageg ven towen.
21Yowbad nataka̱yob teitan tawtoun mo ikow dakul singay avakaein, ilev, in wabwanit, ilana,
“Ma̱wana dakul towen, singay tawtoun to nalev, in watinow,
ven towen avakaein Babilon bikalouw bo ma̱wan.
Nag kal biban vayuwein, nag.
22“Nag kal biligen sal o wous.
Nag aleis vayuwein biwaways o biykiyiks, nag.
Nag kal biban takatanak o tabba̱lal; nag.
Nag kal biligen kalouniw butun ven towen waseg, nag.
23“Lamp mititeilin beikous ven towen waseg.
Ages taveivays beikous ven towen waseg.
Peinan guyawaw ven towen bo nimugwas wadaban pwepway; tage bo ikatidavis ven babaw gimgilis sibwagaw waseg, o simeg waseg.”
24O ven towen waseg neiweiys palopits sisiyas Yowbad angamag babaw, tasiyas neiweiys wadaban pwepway.
Copyright information for
MYW